La Compagnie Folklorique Fanny Thibout 
et les Tiesses di Hoye

Fanny Thibout a nêhou là qui s'famille vikéve: Plèce Sint Michél. Fanny Thibout èsteût eune peûre Lîdjwèsse. A l'atake des annêyes mèye noûf'cint trinte, èle èsteût professeûr "d'expression corporelle et rythmique". A c'timps-là eune di sès k'nohances, Fanny Dets, li d'manda on djoû de l'êdî sol'côp. Li Choråle "A Capella" aveû dandjî d'lèye. Li Choråle, por'sûr, poléve aler tchanter à Nice, ès France, mins èle divéve ossu prèsinter quéquès danses d'amon nos-ôtes...Volà donc nosse Fanny qui dit «awè, avou l'wåde di Dju, dji v'êd'rais». Ele si dishombra, èle avola ès l'Ardenne d'ine reûde abatowe; èle si fêt mostrer lès s'fêtès danses di l'Ardene...Tot d'on plin côp èle rimpliha s'bantê dès êrs di muzike, sovint sins lès pårtèyes : c'èsteût insi qui lès vis Ad'neus li aveût rac'seignî.

Et lès annêyes passèt èdon : nos vorlà ès mèye noûf'cint trinte sihe: Fanny Thibout continouwa à colaborer avou l'choråle "A Capella", à l'ocåzion dès fièsses folklorikes ès France.

Li guére finèye, li choråle s'enn' alla di s'kosté. Li « Compagnie Fanny Thibout» a vèyou l'djoû, èle n'a nin candjî dispôy.Bin vite, li «Compagnie» fourit rik'nohowe å lårdje èt long; c'èst-insi qui l'ministére di l'Educåtion Nationale a riknohou, lu ossu, l'groupe di nosse Fanny. Dispôy, dès spèktåkes ès nosse payi, mins avou à l'ètrindjîr, ènn'a-st-oyou bråmint!

Asteûre sov'néve bin: ès mèye noûf'cint septante kwate, on-z-aveût dèclaré qui c'èsteût l'annêye dès èfants. Là qui lès "spècialisses" mètî soll'scinne dès èfants avou dès rôles qui lèyî d'kosté leûs djeûs, leûs tchansons, Fanny Thibout mèta so pîd lès «Tchièsses di Hoye», tot aprindant ås djonès cårpès èt ås mam'zulettes kimint i d'vî s'kideûre soll'scinne.

Lès «Tchièsses di Hoye» s'enn'alît, zèles avou, plins d'fîrté, mostrer foû d'Lîdje çouk'c'èsteût l'tradition di nos tåyes.

Fanny Thibout fourihe on mimbe fondateûr di l'IGF èt dè CIOFF; èle ovra, si sovint avou, po dès organizåcions èt dès confèrinces, all' seûle condition qui leûs buts fourihent di promouvwèr li danse dès pititès djins, solon l'tradition.

Po finî, nos-ôtes, nos avans fé dell'«Compagnie Fanny Thibout» ine ASBL; tot çoula po nin piède l'oûve d'à Fanny Thibout.